Os estaleiros galegos competirán cun mínimo de dúas empresas polos floteis de Pemex

Foi unha das grandes batallas da campaña electoral galega. Os contratos de Pemex ou, o que é o mesmo, o compromiso de construción de dous buques hoteis (floteis) en Barreras e Navantia que o Goberno galego con Alberto Núñez Feijóo á fronte deu por feito seguen a súa historia alén do 21-O. E todo semella indicar que a seguridade de que o encargo chegue a Galicia non é tal, cando menos polo momento. Despois de que, como vén relatando Praza Pública, diversos directivos da multinacional mexicana negasen que o encargo estivese pechado, agora é a filial encargada de encargar os buques, Pemex Exploración y Producción (PEP), a que detalla como realizará finalmente a adquisición. Farao a través dunha licitación internacional "por convite restrinxido" que porá en marcha "nun máximo de dúas semanas". Isto quere dicir, polo tanto, que Barreras e Navantia terán competidores.

Segundo recollen varios medios mexicanos, como Sipse ou Milenio, o director de PEP, Carlos Gil, explicou o pasado día 9 que a empresa recibu "catro cotizacións" e "as ofertas finais deberán ser presentadas polas compañías interesadas unha vez que se emita a licitación", momento no que se coñecerán as "bases do concurso" co "obxectivo de axilizar o que será a adquisición ou renda dos equipos mariños" -confírmase, polo tanto, que PEP pode mercar ou alugar os floteis-. E, quen son as interesadas? "Pemex Internacional cos estaleiros españois", isto é, unha subsidiaria de Pemex que lle faría o encargo a Barreras e Navantia no caso de resultar gañadora, os estaleiros Goymar -de orixe vasca- e tamén TMM (Transportación Marítima Mexicana).

Noticia completa: http://praza.com/economia/2683/os-estaleiros-galegos-competiran-cun-minimo-de-duas-empresas-polos-floteis-de-pemex/