Feijóo reproduce o argumentario do PP: "A folga non resolve os problemas"

Na xornada de folga xeral do pasado mércores o PP distribuíu entre os seus dirixentes un dos seus habituais argumentarios, dedicado neste caso ás protestas. Como revelou El Diario, os argumentos internos dos conservadores xiraban, esencialmente, en torno a que a folga non resolve a crise e ademais provoca perdas millonarias. Por outra banda, a formación de Mariano Rajoy cargaba as tintas contra o PSOE, por participar nas mobilizacións malia ser responsable da situación actual. Doce horas despois da finalización do día de folga Alberto Núñez Feijóo compareceu ante a prensa na súa calidade de presidente da Xunta en funcións e, ao ser preguntado pola súa valoración do 14-N optou por reproducir, con escasos matices, o argumentario do seu partido.

Ao ser cuestionado polas "masivas" manifestacións que acompañaron o paro xeral Feijoo subliñou que ofrecería "a valoración miña" xa que "a súa -en referencia ao informador que lanzou a pregunta- xa a acabo de coñecer". O líder conservador e futuro presidente reelecto asegura ter o "máximo respecto" polas persoas "que decidiron acudir á folga, porque supón que perden o seu salario" do día, aínda que enfatiza que ese mesmo "máximo respecto" o estende á "maioría da xente, que foi traballar e decidiu non facer folga", exercendo "o seu dereito constitucional a acudir ao seu traballo".

Noticia completa: http://praza.com/politica/2706/feijoo-reproduce-o-argumentario-do-pp-a-folga-non-resolve-os-problemas/