Ferrín dimite e asegura que "a RAG está en perigo"

Méndez Ferrín consuma a súa dimisión como presidente da Real Academia Galega (RAG). Logo dun tenso plenario celebrado este martes na Coruña, o escritor consumou a renuncia anunciada hai xa varias semanas malia as peticións de varios académicos e institucións para que reconsiderase a súa decisión e esgotase cando menos o seu mandato. Ferrín marcha e abandona tamén a cadeira vitalicia que ocupaba desde hai trece anos. "A Academia está en perigo", asegurou nada máis saír da sede da institución e logo de máis de dúas horas de xuntanza.


"Sempre defenderei a Academia e pídolle á cidadanía e ao pobo que a defenda das acechanzas", engadiu Méndez Ferrín ás portas da Academia, onde estivo acompañado por Darío Xohán Cabana, Xosé Luís Axeitos ou Manuel González, que o despediron cunha aperta. "Hai forzas internas e externas que atentan contra ela", engadiu, tras advertir de que pretenden "desvirtuar" a súa razón de ser, que é "a defensa do idioma".

Ademais, Ferrín asegurou que desde xa se situará na súa "paisaxe natural", o das "agrupacións e asociacións culturais e políticas da esquerda nacionalista que si defenden o meu idioma".

Noticia completa: http://praza.com/cultura/3853/ferrin-dimite-e-asegura-que-a-academia-esta-en-perigo/