A Deputación luguesa pide equipamento para atender infartos no hospital e o PP vota en contra

A finais de xaneiro de 2011 o Hospital Lucus Augusti convertíase no centro sanitario de referencia da provincia de Lugo. Dez anos e tres gobernos galegos despois o novo complexo hospitalario substituía o vetusto xeral e as súas carencias arquitectónicas e asistenciais, se ben mantiña algunhas materias pendentes, como a instalación das unidades de hemodinámica, radioterapia e medicina nuclear. De todas estas a máis urxente era a primeira, xa que dela depende a atención urxente de boa parte dos infartos de miocardio e a súa ausencia provoca que unha persoa residente en Lugo tarde 178 minutos tras sufrir este problema de saúde mentres que un coruñés ou coruñesa son atendidos en 98 minutos, segundo datos do hospital da Coruña.

Esta diferenza e, polo tanto, este risco para a saúde dos habitantes da provincia territorialmente máis extensa do país estiveron este mércores presentes no pleno da Deputación provincial que, grazas á maioría que suman PSdeG e BNG, sacou adiante unha moción socialista para esixirlle á Xunta que "licite e adxudique de inmediato" estes equipamentos. Malia asegurar estar a favor desta reclamación o grupo do PP, único da oposición, votou en contra. Isto aconteceu aínda que, segundo asegura o grupo de goberno, os conservadores "coñecían a iniciativa dos socialistas" e mesmo "tiñan unha copia", se ben o Grupo Popular "decidiu presentar" unha moción propia por trámite de urxencia e cun texto "practicamente igual".

Noticia completa: http://praza.com/politica/3132/a-deputacion-luguesa-pide-equipamento-para-atender-infartos-no-hospital-e-o-pp-vota-en-contra/