Nace a Alianza Social Galega, que agrupa a CC.OO, CIG e UGT e outras 60 organizacións

Este xoves celebrouse a primeira reunión de traballo da Alianza Social Galega, na que participaron as organizacións sindicais e sociais máis representativas, unhas 60 en total, críticas coa actual situación de crise que está a padecer a cidadanía galega, e coas políticas de recortes sociais e de dereitos que o goberno da Xunta está a aplicar.

A Alianza Social Galega configúrase como "espazo plural e sectorial para a mobilización contra as políticas de recorte" e pretende xerar "o maior espazo de unidade e mobilización fronte aos recortes sociais e en dereitos, e na formulación de alternativas sociais fronte á crise". O vindeiro xoves 18 de outubro haberá unha segunda xuntanza deste grupo e nela presentarase publicamente o seu manifesto fundacional e as súas principais propostas. Esta Alianza Social segue un modelo semellante ao que leva funcionando un tempo noutros territorios do Estado baixo a fórmula dos Cumios Sociais, que buscan a converxencia entre sindicatos e outro tipo de movementos sociais

O vindeiro xoves 18 de outubro haberá unha segunda xuntanza deste grupo e nela presentarase publicamente o seu manifesto fundacional e as súas principais propostas

O acordo comezou a forxarse no pasado mes de xullo ao abeiro das masivas manifestacións unitarias do dia 19 nas que participaron máis de 300 mil galegos e galegas. Ao longo de agosto o proceso quedou freado pero retomouse en setembro. E esta coincidencia de obxectivos e conciencia da necesidade de converxencia chegou até a xuntanza deste xoves, na que o groso das máis de 60 organizacións que participaron amosaron a súa disposición a conformar este espazo de debate e acción.

Forman parte desta Alianza os tres principais sindicatos: CC.OO, CIG e UGT, que lanzaron a convocatoria en xullo, ademais doutras organizacións sindicais máis minoritarias ou sectoriais. Ademais, están representadas ONGs, entidades culturais, de pais e nais, de autónomos, de veciños, de estudantes e de afectados por distintas causas. Algunhas delas aínda non aprobaron definitivamente a súa participación e farano nos vindeiros días, antes da xuntanza do 18.

Noticia completa: http://praza.com/movementos-sociais/2317/nace-a-alianza-social-galega-que-agrupa-a-ccoo-cig-e-ugt-e-outras-60-organizacions/