Guillerme Vázquez deixará de liderar o BNG tras a "reflexión" da derrota electoral

"Seguirei no BNG, pero non será como portavoz nacional". O BNG celebra este sábado o seu primeiro Consello Nacional tras o duro resultado das eleccións do 21 de outubro e o seu líder, Guillerme Vázquez, aproveitou este foro para anunciarlle ao máximo órgano da formación entre asembleas a súa decisión de non continuar no cargo. Non será unha dimisión instantánea, como acontecera en 2009 con Anxo Quintana e o resto da Executiva que encabezaba, senón que será no momento en que conclúa a "reflexión" que o Bloque abre no propio Consello para elaborar, en verbas de Vázquez, un "novo proxecto nacionalista" que, todo semella indicar, se concretará nunha Asemblea Nacional extraordinaria.

"Non son temos de abandonar" e por iso "eu non abandonarei", explicoulles Guillerme Vázquez aos membros do Consello reunidos na sede nacional do BNG. Ese "abandono" sería "o máis cómodo", pero equivalería a "fuxir dos problemas". El, pola contra, asegura ser consciente de que o Bloque é "un barco que precisa reparación", pero segue a ser o mellor dos barcos para lograr a "soberanía" e a "xustiza social" e unha "nova persoa" debe situarse na ponte de mando. Pola súa banda o único "lamento" que deixa polo camiño é o de "non ter contribuído máis a que os galegos visen no BNG a forza" na que confiar para encabezar unha alternativa política. Isto, asegura, foi "por falta de habilidades persoais", pero non de traballo.

Noticia completa: http://praza.com/politica/2501/guillerme-vazquez-deixara-de-liderar-o-bng-tras-a-reflexion-da-derrota-electoral/