A portavoz do Grupo Socialista na Comisión da RTVG, María Quintas, criticou o incumprimento da Lei de Medios Públicos por parte da CRTVG por “interese partidista” de Feijóo.Quintas dixo que o PP "atrasou a aplicación da nova Lei para chegar ás eleccións autonómicas coa mesma estrutura de supeditación do ente á Xunta”, adiando a elección da nova dirección e do consello, así como a aprobación do mandato marco e a adaptación á Lei en relación á garantía da pluralidade informativa. Afirmou que, con este atraso, o PP garantiu un tratamento da información favorable co que “en numerosas ocasións conculcáronse os principios de liberdade de expresión, obxectividade, veracidade e imparcialidade”.
De igual xeito, a deputada do BNG Montse Prado acusou a dirección da CRTVG de poñer a Televisión galega “ao servizo do Goberno e do Partido Popular” e de non respectar o pluralismo político representado na Cámara galega.
Pola súa banda, o deputado de AGE David Fernández Calviño centrou a súa intervención en denunciar a “cada vez maior presenza do castelán nas programacións da radio e da televisión de Galicia”. E sinalou que “isto acontece sobre todo nas tertulias, ateigadas do que Carlos Taibo denomina todólogos”, para recomendar que “busquen a outros, que os hai, que saben galego, e que seguro que din menos estupideces”. Tamén recomendou que se fale máis “do deporte de base e menos do fútbol profesional", e reclamou un maior tratamento "da difusión cultural e artística e de grupos sociais non representados nos medios non comerciais”. Fernández Calviño pechou a súa intervención preguntando se o PP é quen "de garantir que non van privatizar a radio e a televisión pública nesta lexislatura”.
Noticia completa: http://praza.com/politica/3329/a-oposicion-critica-o-control-politico-da-crtvg-e-o-crecente-uso-do-castelan/
No hay comentarios:
Publicar un comentario