Fernando Vázquez ou Suso de Toro chaman a manifestarse este 17M polo galego

O adestrador Fernando Vázquez, o escritores Suso de Toro, Manuel Rivas e Begoña Caamaño ou a música Mercedes Peón. Son só algúns dos persoeiros que veñen de apoir un manifesto de apoio á manifestación que este venres 17 de maio convoca Queremos Galego en Compostela baixo o lema Non queremos ser estranxeiras na propia patria, en homenaxe a Rosalía de Castro no día no que se cumpren 150 anos da publicación do primeiro libro contemporáneo monolingüe en galego, Cantares Gallegos.


O manifesto, asinado por outras moitas personalidades, reivindica o galego como "base fundamental sobre a que nos sustentamos como pobo" e recorda que "se deixamos que esa base se estrague, todo canto se apoia nela, a nosa esencia como galegos e galegas, abaneará como a terra nun sismo devastador". Así, os asinantes atopan "motivos dabondo" para mobilizarse e pedir á cidadanía que se manifeste na capital galega.

Entre os argumentos que xustifican o apoio á manifestación, os asinantes censuran un goberno galego "que debería promocionar e proxectar a lingua propia de Galiza, mais que en lugar diso fai xustamente o contrario, levando adiante medidas que só afondan nos retrocesos que o galego está a sofrir". Así, lembran que a Xunta emitiu un decreto que "mingua as posibilidades de uso no ensino a mínimos históricos desde a existencia da Lei de Normalización Lingüística".

Noticia completa: http://praza.com/movementos-sociais/4488/fernando-vazquez-ou-suso-de-toro-chaman-a-manifestarse-este-17m-polo-galego/