Traballadores denuncian nun blog a "manipulación informativa" na TVG

Traballadores da TVG denuncian a "manipulación informativa" que, segundo eles, se dá nos telexornais da canle pública galega. Logo de expresar o seu malestar en varias ocasións co tratamento que se lle dá a certas noticias -especialmente en todas aquelas que están relacionados co PP ou con administracións gobernadas polos conservadores-, o comité vai máis aló e vén de sacar á luz un blog no que se analizan numerosas novas, comparando o tratamento que reciben na televisión autonómica co que se lle dá noutros medios.


Así, a bitácora Eu non manipulo analiza con detalle ata quince informacións emitidas en diferentes telexornais da TVG. A primeira delas ten que ver coas polémicas fotos publicadas polo diario El País onde o presidente da Xunta, Alberto Núñez Feijóo, sae retratado xunto ao narcotraficante Marcial Dorado, que cumpre condena na cadea.

"Ese mesmo día, no Telexornal ofrécese un único video onde se recollen as fotos publicadas por El País, as explicacións do presidente Feijóo á Radio Galega e o comunicado do PP, sen ofrecer ningún dos detalles achegados polo xornal na súa exclusiva", destaca a análise deste blog, que repara tamén no feito de que o vídeo sobre esta relevante información -que foi portada en case todos os medios- se emitise "ás 14:42 e ás 21:12, ben avanzados os telexornais do día", ademais de denunciar que "non se ofrecesen reaccións dos distintos partidos políticos galegos".

Noticia completa: http://praza.com/movementos-sociais/4050/traballadores-denuncian-nun-blog-a-manipulacion-informativa-na-tvg/