Sen comunicación oficial do propio Parlamento os xornalistas tiveron que compoñer o bosquexo da proposta presidencial baseándose no exposto polos voceiros da oposición e o do propio PP, Pedro Puy, quen por razóns obvias manexa unha versión máis precisa do asunto. "Á luz das conversas" mantidas nas pasadas semanas, explica Puy, Rojo valora "recuperar os acordos que xa tiñamos", isto é, que os grupos "trasladen listas de convidados" en cada pleno. Quen provoque incidentes e sexa expulsado "non volverá entrar no pleno" e ademais o grupo que o convidase terá prohibido realizar novos convites durante un tempo determinado -por exemplo, un período de sesións-.
A estas regras súmase "unha posibilidade que nos parece interesante", di Puy. Trátase "dun compromiso de autorresponsabilización por parte do propio convidado", que ao chegar ao Pazo do Hórreo asinaría un documento explicativo das normas que rexen as sesións -prohibición de realizar manifestacións orais dende a tribuna de convidados ou veto a amosar pancartas-. Se a persoa convidada "non asume" as "obrigas" non se lle prohibiría a entrada, pero "ofertaríaselle" non seguir o pleno "en directo", senón a través dunha pantalla instalada noutra dependencia do edificio.
Valoración da oposición
Coa cautela propia de quen non coñece a proposta máis que parcial e verbalmente, a oposición segue a amosar reservas a respecto da posición de Rojo. "Por suposto que queremos manter a orde no Parlamento, pero non imos aceptar un control político das visitas", resume o socialista Abel Losada quen ademais coida que as regras do xogo deben tamén estar rexidas pola "sensibilidade anet unha situación social, económica e laboral enormemente difícil". Neste sentido, Losada advirte de que "unha camisola ou unha pancarta non impide o normal desenvolvemento dun pleno", polo que non caben restricións e que despois "ao establishment do PP se lle encha a boca falando de abrir as portas do Parlamento" á cidadanía". Ademais, ao seu xuízo, "a dignidade do Parlamento tamén se cultiva doutra maneira" como, por exemplo, non abusando do trámite de urxencia para aprobar leis, ilustra.
No hay comentarios:
Publicar un comentario