A presión social fai recuar ao PP, que di si á tramitación da ILP sobre desafiuzamentos

Rectificación e marcha atrás. A presión social, en especial a que até o último momento fixo a Plataforma de Afectados por la Hipoteca (PAH) obrigou o PP a recuar e decidir apoiar a tramitación da Iniciativa Lexislativa Popular (ILP) contra os desafiuzamentos e a prol da dación en pago. Todo, malia que os populares negaron até o último momento que fosen aprobar o que unicamente é a toma en consideración da devandita ILP.


Foi a mobilización continua e a presión social, ademais dos máis de 1,4 millóns de sinaturas, a que fixo cambiar de opinión ao PP. Xusto antes da votacións, membros da PAH reuníronse cos voceiros da materia do grupo Popular para intentar convencelos de que, cando menos, aceptasen o trámite. "Pedimos aos deputados que non desprecen os cidadáns", pediu Ada Colau, unha das portavoces da plataforma e a máis significativa de todas elas.

Xa ao mediodía, os activistas solicitáranlles a todos os deputados que votaran a favor, máis aínda tendo en conta que aceptar a iniciativa a trámite non supuña aceptar o seu contido, senón debatela a expensas de cambios. Unha proposta "de mínimos" que, de non ser aceptada, ía desembocar en manifestacións ante as sedes do PP, tal e como propuxo a PAH, ademais de varias mobilizacións que xa se deron fronte ao Congreso durante todo o día.

Noticia completa: http://praza.com/movementos-sociais/3572/a-presion-social-fai-recuar-ao-pp-que-di-si-a-tramitacion-da-ilp-sobre-desafiuzamentos/